Akikat.kz - рухани танымдық, ғылыми портал

http://akikat.kz

Басты бет > Мақалалар > Ақида және ғибадат > Зейнептің шеберханасы

Зейнептің шеберханасы

2021-08-18 59

Мүминдердің анасы Жахш қызы Зейнептің өміріне көз жіберсек, ондағы діндарлық, жомарттық қасиеттерімен қоса оның ерекше шеберлігінің куәсі боламыз. Һижреттің (Мәдинаға көштің) үшінші жылы ардақты Пайғамбармен отасқан Жахш қызы Зейнеп тері илеудің асқан шебері еді. Ол тері өңдеп, одан киім тігіп сатумен айналысатын. Кейбір риуаяттарда осы жұмыс үшін пайғамбар үйінде бір бөлме арнайы жабдықталып, шеберхана ретінде пайдаланылғандығы әрі пайғамбарымыздың әйелдерінен Үмму-Сәләманың да осы тері ісімен шұғылданғандығы білінуде. Дәл осы жерде мынандай бір көкейтесті сұрақтың ойға орала кетуі заңды.

Ислам заңдары (фиқһ) бойынша әйел нәпақасы (күнкөрісі, табысы) күйеуіне тән. Әйел жұмыс істеп, ақша табуға міндетті емес. Олай болса, пайғамбар әйелдерінің жұмыс істеуі неліктен? Оның жауабы мынада: Жалпы Ислам діні әйелді жұмыс істеуге мәжбүрлемейді. Бұл дегеніңіз «сен жұмыс істемеуге міндеттісің» деген сөз емес. Күйеуінің рұқсатымен Ислами әдеп шеңберінен аспайтын шарттармен әйелдің жұмыс істеп, ақша табуына ешқандай да кедергі жоқ. Зейнеп анамыз жұмыс істеуі күндік нәпақасын табу үшін емес, қайта кедей-кепшіктерге, жарлы-жақыбайларға қол ұшын беру, аш-жалаңаштарға қарасу, Алла жолында өз әлінше осылай қызмет ету ниетінде болатын.
Ол жайлы Айша анамыз былай дейді: «Мен басқаларға жақсылық жасауда, қайыр-садақа үлестіруде, туысшылдық пен Аллаға жақындататын игі іс істеуде Зейнептей алдына жан салмайтын адамды көрген емеспін».

Ибн Сағдтың риуаятынша: «Зейнеп дүниеден қайтқанда бар дүние мүлкін өзі көзі тірісінде садақа ғып таратып жібергендіктен артында бір тиын да қалмаған. Ол – кедейлер мен жетім-жесірлердің панасы еді» дейді.
Жоғарыдағылардың бәрін талдай келгенде біріншіден, Исламдағы әйел қандай да бір қажеттілігі болмаса да, ол бос отырмауы керек. Ең жоқ дегенде табыс тауып, оны Алла жолында жұмсағаны дұрыс. Екіншіден, әйелдің үйдегі тіршіліктеріне күйеуі кедергі жасамауы керек, қайта қолдан келгенше мүмкіндік жасауға тиіс. Өйткені әлемнің мақтанышы Пайғамбарымыздың өзі де осылай істеген. Әйтпесе, Расулалланың рұқсатынсыз Зейнеп анамыздың бұндай іске баруы мүмкін емес еді.



Оқи отырыңыз